Detail

議政論政>> 施政辯論

宋碧琪2017年運輸工務司施政辯論

 2017年運輸工務司施政辯論

宋碧琪2016.12.06

 

司長,時間過得很快,您上任至今已差不多兩年時間。在這兩年時間裡,您由一個人到今日您所講的3400人組成的團隊,人手真是無變過,但人員就大部分改頭換面,但面對特區政府各式各樣的工程期票,您同您的團隊都依然堅守崗位、一個逃兵都無係咁不停去做、不停兌票,真心講您地班同事都算唔話得。每一個人都有自己的家庭,但為了澳門的發展工作,放低家人、放低孩子,一頭熱血全埋在工作上,去到這個點,如果再有不滿的話,我良心上真是過意唔去,更何況現時走完澳門一圈,都有一些基建實景睇下,好過以前咩都無啊!

司長,隨著澳門的發展大局已定,今日的澳門已經進入了一個規劃發展關鍵時期,面對<<澳門特別行政五年發展規劃>>藍圖,您同您的團隊更加任重道遠。司長,面對過去、現在或將來發展,問題在哪、方向在哪,相信您都一清二楚,更心中有數,我再在您關公面前耍大刀就無引啦,所以今日換一換角色同您同及您的團隊加兩點油,但司長,我這兩點油並唔係想俾您團隊火上添油用嫁,千奇唔好搞錯我講的原意啊!

第一點油:人要加油

司長,睇您這份明年的施政方針,入面要做的工作寫到密密麻麻,剩係睇您列的兩個附件列表,都睇到眼花啦!明年要做的研究項目就有36個,超過一億的規劃設計工程項目就有21個,超過一億要做的工程項目更有35個,司長,咁多工夫要做,使大錢就唔使講啦,但您都俾同事抖下氣啊!飯食得多、食得快都會有事啦,更何況人,工作係咁加都唔係辦法。雖然很多基建在過去跑輸幾條街,但現在要一下子追返幾條街,是唔是現實呢?司長,工程唔同其他,有一些工序時間是定死的,現實環境真是要睇,唔係真是搞死人嫁!正如您去年施政的時候講:運建辦成立的時候,平均的年紀是三十多歲,或者大部分三十歲都無。大家好願意做,有些或者是好叻的工程師、則師,但明唔明政府程序又是一回事?再加上決策斬件來做,唔出問題先奇!司長,經過一年的摸索,今日終於找到一條方,明年將撤銷運輸基建辦公室,並設立一間公共服務的專營公司去做。無論結果如何,起碼唔使讓行政程序綁死專家,讓有志做事的人亦有空間加油、落足馬力去做。司長,輕軌只是您這個範疇的前菜,真正有份量的主菜非建設辦莫屬,數過下剛才的列表中的工程有關研究、規劃設計、判給等項目,建設辦佔了28項,但人手不足100人,司長您叫您的同事點搞啊?D質量又點會有保證呢?司長,建設辦負責的每一項都是民生大事,房屋、醫療、填海、第四條大橋、天眼等等,這些都是社會所急用的,您在這裡再唔落油又點得呢?到底未來將有何措施提速保質落實民生基建工程呢?

第二點:工作要加油

司長,大家提了唔少工作,這裡又要做,那裡又要做,落足油加大馬力已在所難免,所以要加油。司長,但做還做,有一些嘢也要睇清楚,唔係的話,點做都唔得,但我相信司長眼光,看得清又看得遠!司長,唔係無版俾您睇,海一居就是一個大版。司長,小業主真是好慘,被搞到唔湯唔水,如果您落去了解,故事講都講唔曬。司長,小業主要求都好簡單姐,想在安居樂業都咁難?件事發生後,全社會都很關注,唔少的人都想方設法去幫手,包括今日的鄭議員一連幾日大發炮,可以講有些用心的人是比皇帝還要著急。這幾日,網絡上不停係咁傳唔同的言論、更有人大作文章擺人上,唔係的話就可能好似陳明金議員咁無講過都可能變有講過,甚至唔明的人還以為鄭議員要大作為修改土地法,好在今日鄭安庭議員說清楚講明白不會修土地法,唔係的話,真是有心人裝無心人,小業主更可能再俾人無限想象與土地法綁架。司長,小業主只是想政府幫手解決海一居這件事,並無其他非份之想,更無要得罪澳門人為土地法鬆綁,這點政府真係要搞清楚,政府唔好成日拿土地法來作籍口,亦唔好俾人拿土地法來作籍口,真是要想下辦法幫下小業主。司長,希望在這件事亦要落少少油,為小業主想想辦法,幫幫小業主!

追問:

多謝司長回應,知道司長難做,有一些事亦無辦法講返轉頭,但無論如何,仍然希望司長未來多關心海一居小業主,因為小業主在這件事上真是好無辜,尤其是那些二手、三手買入的小業主,佢地有一些真係俾人蒙在古裡。

司長,講到公屋質量,今日亦受到一些石排灣居民委託,要感謝房屋局及建設辦的同事對一些設施的跟進,尤其是公廁設施及磁磚剝落等等,更值得一提的是業興大廈的電梯膠轆問題,雖然經您地同事跟進,有關承建公司承諾會全部更換,但這些後續的補護對居民的生活及安全亦造成影響,希望當局未來能注意。另外,提到石排灣,都要提一提石排灣的過路設施,大家都知石排灣住有唔少老人家、傷殘人士,但在過路方面,現在主要以天橋為主,雖然天橋有𨋢搭,但部𨋢時好時壞,要老人家行上行落真是好辛苦,尤其是現時開通的巴士總站,人來人往,一條班馬線都無,居民行都鬼死咁遠先過到馬路,所以居民都希望司長落去看看,有無空間可以調整一下?