Detail

議政論政>> 施政辯論

宋碧琪 2017年社會文化司範疇施政辯論

 2017年社會文化司範疇施政辯論

宋碧琪2016.12.02

 

司長,從社會的角度,您範疇的工作包羅萬有。人的一生,由生、老、病到死,每個關鍵時刻都關係到您。可以講,您的位置、您的範疇在社會中佔有重要一席位,更佔有主導先機,尤其在澳門未來發展的新局面上,您的一舉一動更會牽動著每一個澳門人的思緒。司長,今日您要擔起社文司這支大旗,大家都理解確實不容易,瞻前顧後、東征西討、左右做人,正如昨日張立群議員所講:你要做全部人嘢,真係不能盡如人意。

司長,其實居民都是有眼睇,邊個有做野,邊個無做野,是睇得清清楚楚,但作為居民從來都無懷疑或否定您工作的熱誠。居民茶餘飯後傾下閒解,都有講您上任後是有帶起一股新風氣,起碼夠膽講要醫療光輝五年,而從一些政策上亦見到您諗著唔少創新,如籃天工程、旅遊無限式等等。實情大家都是想支持您工作,如果唔係,都唔會有咁多醫療團體大刊日報支持您政策啦,今日都唔會有咁多您的同事坐晒系到支持您啦,我地更加唔使對您講咁多野啦!我唔知司長您感唔感受到。司長,澳門今時已不同往日,社會是多元的,聲音亦是多元的,有好聽的說話亦有唔好聽的說話,但無論好聽或唔好聽,既然今時今日您坐在這個位置上,更加需要聽,正所謂:食得咸魚抵得渴!

司長,您個範疇是同居民的距離最近、接觸最多、關係最大,居民對您的期望亦是最大。司長,您工作做得好,造福的始終是居民。一直以來,司長亦強調再強調,重視民意,更不分日夜跑到一線的醫療服務、社會服務直接面對民意,這是相當好的。在昨日的引介中,您更難能可貴提到:面對市民大眾的不同訴求,將以廣大市民的利益為依歸,善用社會資源,發揮施政成效,為廣大市民謀福祉,為下一代創造良好環境;以敢於擔當的精神,勇於作為,迎難而上,並繼續謙虛聽取社會各界的意見,廣納民意,尋求更大的共識。既然今日司長的胸懷如此開闊,居民委託我有兩點意見要同您當面請教一下。

 

第一點意見:醫療服務

司長,由昨日到今日,都有幾位同事關注到醫療資源投入問題,剛才局長所講的可能是衛生局的預算,但議員所講的81億是整體醫療衛生範疇的投入。如果這個投入能換來居民的醫療服務到位,相信社會亦會理解支持。但若果政府投入大、服務仍跟不上,當然居民梗係大有意見啦!多的不講,今日就同司長講講癌症病患的醫療服務。大家都知道,隨著環境的變化,現時癌症已成為了澳門居民的頭號 殺手,形勢是如何,相信政府一清二楚,如果唔係都唔會推出 大腸癌篩查計劃,以預防為先。有預防梗係好啦,但都不能忘記躺在病床上的病患先得,而這群正在患病的居民更需要大家多點關注,更要得到位的醫療服務。司長,您到過前線,我唔知您知唔知,現時一個癌症病人去到醫院排隊等接受化療,平均每個病人閒閒地都要等上二個鍾,多則四五個鐘,我都了解過,唔係你地前線同事不想快,而是佢地都做到踢晒腳、扯到盡都要咁長時間,根本就是專科醫生又唔夠、護士又唔夠,在咁的環境下,大家又可以點做呢?昨日,有同事講到公私失衡,聽落真是很令人稀虛感概,在投入醫療資源咁大的澳門,醫療都可以搞成咁?到底是錢多得濟啊,還是服務流得濟呢?司長,唔講治療,講下臨終服務,全澳得鏡湖有一個康寧,做了二十年,位又是咁多,等都等唔到。作為家屬可以點呢?只能自己辛苦點,湊返屋企自己睇。司長,一時三刻請個假短期都可以照顧得來,但要等到一年半載先有位,難道真係唔使搵食咩,您叫居民又點捱呢?留個病患自己在家中,無人照顧,作為家人又於心何忍呢?司長,面對醫療服務訴求的增加,未來政府將如何優化增加服務,讓居民得到妥善醫療呢?

 

第二點意見:持續進修

    司長,澳門教育資源的投入,政府也絕不含糊 ,2010年,教育領域預算投入是63.7億,到了2017年,預算是115億,提高了八成。加大教育資源的投入,為教師、學生提供良好的教學環境,值得支持,但是,同醫療投入同樣的道理,公帑投入教育,要用得其所。

司長,特區政府為鼓勵終生學習,由2011年起推出持續進修計劃,第一階段投入近52千萬,到今日第二階段支出金額是將近7億,未來還有第三階段。由11年到今年,五年時間使了將近13億元,司長,為了這些錢,坊間真是不盡其謀,估都估唔到,竟然有公務員以兼職身份出來教人地點樣考到公務員。司長,到底這些課程的效益係邊到呢?到底這筆錢使左,令整體社會的教育水平又提升了幾多呢?